Na faamaonia mai e le afioga ia Fata Ryan Schuster e lē moni faamatalaga e salalau solo e faapea ua ave i tua lana tagi o palota laiti lea o loo ia lu’i ai ma tuuaia le sui na manumalo mo Sagaga No.2 ia Maulolo Tavita Amosa o le HRPP i faiga faatosina o palota.
Taua e Fata e leai se maliega na autasi ai o ia ma lana Komiti ina ia faaui i tua lea tagi.
I se faatalatalanoaga a le Samoa Observer ma le susuga ia Fata Ryan Schuster o lē sa tauva mai i lalo o le faamalu a le vaega faaupufai o le Faatuatua i le Atua Samoa ua Tasi na ia taua ai ua fesiligia o ia e nisi pe moni o le a lē faaauauina lana tagi na faaulu peitai o lana talitonu o nei tala salalau na afua mai luga o le Facebook.
Taua e Fata “O loo o’u mafaufau pea iai , e tasi le masina o’u te tilotilo ai lea vaega ma e tatau ona o’u talanoa i lo’u aiga”.
O Fata o se tasi o sui tauva mo Sagaga No.2 i palota laiti lea na faataunuuina ia Novema o le tausaga na te’a nei lea e le’i Manuia ana taumafaiga ma o loo ia tuuaia le sui manumalo masalomia le faia o ni faiga faaalatua ma totogi tupe tagata ina ia palota ia te ia.
E le gata i lea o loo iai foi le talitonuga a Maulolo na auai foi Fata i faiga faaalatua i le taimi o faigapalota laiti na faatoa uma nei
