Search
Search
Photo by M.E.S.C.

Faamanatu le vaiaso o le Gagana Samoa

“A mou le gagana ua mou le aganuu, a mou le aganuu ona olaolanoa lea o Samoa,” Minisita o Aoga i le faamanatuina o le vaiaso o le gagana Samoa.

O lenei taeao afua o se tofa manino na a’e ae o se faatofala’iga sa iloilo e le Matagaluega o Aoga Taaloga ma Aganuu.

Na tatala aloaia ma molimauina e nisi o fanau aoga sa valaaulia lo latou sao mo lenei faamoemoe.

Saunoa le Minisita o Aoga Seuula Ioane Tuaau e faamanatu le tāua o le gagana Samoa i le faasinomaga a le tagata.

“O le faamanatuina o le vaiaso o le Gagana Samoa o se matati’a ma se tofa loloto ina ia faamautu malupuipuia faasao ma faalauiloa le tāua o le gagana Samoa.”

O le autu o lenei vaiaso faamanatu o lau gagana o lou tofi mai le Atua.

“E moni e faigofie lenei autu ae o se feau faamanatu ua ogatasi ai ma le manulauti a le tatou Matagaluega o se faatulagaga o aoaoga lelei ma atoatoa e amanaia le itu faaleagaga le itu faaleaganuu.

“Ae le gata i lena ua masaga tutusa lelei lenei uluai taumafaiga ma le taiala o le atina’e o le lumanai manuia Samoa.”

O lenei faamoemoe oloo taimua ai le komisi ole Gagana Samoa oloo i lalo ole faamalumaluga ale Matagaluega o Aoga Taaloga ma Aganuu.

Oloo faafoeina a latou galuega e tusa male tulafono autu ile 2014 e taimua i galuega ma faatinoga ina ia faasao le Gagana Samoa.

“O suiga oloo aumai ai mea lelei ma mea faalelei e ona avea ma auala e faagalo ai la tatou gagana.

“Ua tele le suiga o Samoa o se mea lelei ae o lona ua avea lo tatou apo o nei suiga tetele ma ua lofia ai lo tatou tofi mai le Atua.

“O le gagana Samoa o le isi lea poutu o le ola o le aganuu afai e leai se gagana e lē mafai ona faamatalaina le aganuu.”

E faamae’a le aso le polokalame i Upolu nei ona agai lea i Savaii e taualuga ai.

Tala sili ona faitaulia

TALA FOU MAI SAMOA

SAMOA UPDATE

PODCASTS

Listen on

FAATALATALANOAGA

POLOKALAME A LEOLEO

Keep uptodate with Radio Samoa activity & promotion

* indicates required