O le asō lea na tatala aloaia ai i le motu tele i Salafai i le vaiaso e faamanatu ai e Samoa ma le lalolagi atoa le tāua o le faasusuina o pepe i o latou tina.

O le autu ua faamamafa ai lenei aso faamanatu i lenei foi tausaga “Fai se suiga lelei, unaia ma faatāua le faasusu o pepe i suasusu o tina e le gata i fale faigaluega ae o soo se nofoaga talafeagai.”

O le Minisita a le Soifua Maloloina, o Valasi Luapitofanua Toogamaga Tafito Selesele o loo ia ta’ua ai le lagolagoina e faalapotopotoga tau le soifua maloloina i le lalolagi le unaia pea o le faasusuina o pepe i suasusu o le tina e ui ina tele suiga ua iai nei.

“E tāua lava le faasusuina o pepe i suasusu o tina e puipuia ai mai le aafia i faama’i.

“E tusa ai ma suesuega a le Soifua Maloloina o le lalolagi, e faasaoina ola o pepe ma fanauiti pe a faasusuina i o latou lava tina aemaise lava atunuu e itiiti le tamaoaiga e pei o Samoa.”

E pei ona faaalia e le Minisita o suesuega a le matagaluega i le tausaga 2014 o loo tulai mai ai le silia i le ‘afa o le 70 pasene e i lalo ifo o le tausaga le matutua o fanau o loo vaaia le lelei ona fafagaina ae o le 2019 na vaaia ai le pa’ū maualalo ai o le pasene ma na ia ta’ua ai e ao ina toe faaleleia lea tulaga.

“Mo le faaleleia ma siitia le tulaga o a tatou taumafaiga i le faatāuaina o le faasusuina o pepe i o latou lava tina ou te fia faamanatu ai nisi o feau tāua.

“E mai suesuega ua faamaonia ai o le auala pito sili ona lelei mo le fafagaina o pepe ia faasusu pea i o latou tina mai le uluai 6 masina, fafaga pepe i meaai talafeagai mai le 6 masina o lona matua.

“O le faamalosiau i lenei vaiaso ina ia tatou galulue faatasi e faatāua nei taumafaiga auā se Samoa soifua maloloina e ala i faalauiloa puipui ma lagolago e ala i le faasusu o pepe i tina.”

O le aso 7 e faamae’a ai lenei faalauiloa ina ia logologo puialii pea le atunuu aemaise i tina le tāua o le suasusu mo pepe ma fanauiti.