O le faaiuga o le vaiaso na faatino ai le faamoemoe a le Faalapotopotoga o le Soifua Maloloina a le Lalolagi (World Health Organization) e faamanatu ai le 75 tausaga o lana auaunaga faalesoifua maloloina e le gata i le lalolagi ae mo Samoa lava ia.
O lenei faamoemoe na saunoa ai le Palemia o Samoa, Afioga Fiame Naomi Mataafa i le tāua o le WHO i le soifuaga lautele o tagata e ala i le tele o fesoasoani ua ofoina i le atunuu.
“I soo se taimi tatou te faia ai se aso faamanatu e tatau lava ona o tatou toe tepa i tua i le amataga i le sao tāua o galuega na faatino lea ua mafai ai ona tatou ‘ae’ae i lenei vaitau.”
“Ua tele le agalelei sasaa a lenei faalapotopotoga i soo se taimi, e aofia ai polokalame faagasolo e fesoasoani i vaega ua faataatitia e le soifua maloloina a le atunuu, o tuipuipui mo le tele o faama’i ae le gata i lea o le faamai pepesi o le Koviti-19 lea na aafia ai le lalolagi faatasi ai ma le misela sa lofia ai le atunuu i tausaga ua mavae.”
“O fua ia o galuega a le faalapotopotoga mai le 75 tausaga ua mavae o la outou tautua i le soifua manuia o tagata.”
Na faaalia ai foi le finagalo o le Palemia e tusa ai o le tausaga na sainia ai se maliega a le Malo o Samoa ma le faalapotopotoga i le 1962.
“E manatua i lena taimi le faavae ai o le faigapaaga a o tulai mai le Afioga Fiame Mataafa Faumuina Mulinuu II, o le Palemia muamua o le Malo Tutoatasi o Samoa na sainia ai le Basic Agreement ma se tasi o foma’i mai le faalapotopotoga, Dr I. Chi Fang.”
O se fiafiaga tele e pei ona ta’ua ai e Fiame le faamautu lea o le ofisa a le faalapotopotoga i Samoa nei a o lei faavaeina i nisi o atunuu o le Pasefika.
