O le aso a taeao e atoa iai le 30 tausaga a le Ofisa o le Siosiomaga a le Pasefika(SPREP) talu ona sainia se feagaiga i le aso 16 Iuni 1993 e avea ai lenei vaega ma ofisa tuma’oti a le Pasefika e galulue i polokalame faatino mo le puipuia ai o siosiomaga i le Pasefika.

Na ta’ua ai e le Faatonu Sili, Sefanaia Nnawadra i lana saunoaga i le taeao nei le faatuina mai o lenei ofisa.

“O Samoa ua avea lea ma nofoaga tumau a le SPREP talu mai le 1992 ma i le na taimi e na o le 15 i latou e iai le tomai faapitoa i vaega o le siosiomaga ma le 12 o sui galulue e lagolagoina auaunaga a le ofisa.”

“Na tele ni manatu sa iai i lena vaitau i le vavevave ai ona agai mai le ofisa lenei ina ua mae’a ai na o afa tetele sa aafia ai Samoa ia Ofa ma Valelia i le 1990.

“Ae peitai sa iai se tasi o sui na ia faapea e ao ona agai mai loa i le taimi lea lenei ofisa e ave le fesoasoani ia Samoa a o iai i tulaga faigata o le mae’a ai o nei afā.”

O le taunuu mai ai o le ofisa lenei i Samoa na faatino ai la latou auaunaga mai lo latou ofisa i Vaitele a o lei faamautu i le nofoaga o loo iai nei.

Na ta’ua e Nawadra o le tausaga e 1996, na tuuina ai loa e le Malo o Samoa se lisi o le fanau e tusa ma le 10 eka i Vailima e faamautu ai le ofisa tutotonu o lenei nofoaga o se tasi o vaega o le togalaau tele a Vailima sa siomia ai le fale mataaga a le tusitala Ropati Lui Sitivinisone.

“O lenei ofisa e agatonu lea ma le puipuia ma le faasaoina o le siosiomaga i le Pasefika ma e laualuga lava la matou auaunaga o o tatou tagata ina ia maua se siosiomaga saogalemu.

“E avea ai foi lenei avanoa e faafetaia ai i paaga uma a le SPREP i le Pasefika ma atunuu e mamao ae faapitoa lau faafetai ia i latou o loo auauna i le taimi nei i matafaioi ma tiute o loo feagai ai mai le 30 tausaga talu ai seia oo mai i le aso.”