O le asō ua faamanatu ai le 20 tausaga talu ona tupu le faalavelave i Bali na maliliu ai tagata e 202 e aofia ai tagata Ausetalia e toa 88.
O le aso lenei i le tausaga 2002 na faapa ai pomu e tolu i falekalapu i totonu o Bali ma maliliu ai i latou ia.
O le sauniga la na faia i Sini i le asō e faamanatu ai lea faalavelaev na saunoa ai le Palemia, Anthony Albanese o nei osofaiga o ni gaioiga le alofa ma tusa poo le a le umi talu ona tupu nei faalavelave e le faaitiitia ai le tiga ma le mafatia o aiga ma uo a i latou ua maliliu.
Na faia foi se sauniga i le laumua i Canberra na aofia ai faipule o le Palemene a Ausetalia, leoleo ma i latou na faasaoina mai lea faalavelave aemaise aiga o e na maliliu ma saunoa ai le minisita o le va i fafo Penny Wong e manatua soifua ua ma’umau.
