Ua tapena foi ma nofo sauni le komiuiniti o tagata Samoa i Niu Sa Uelese aemaise i Sini mo le faamanatuina o le tutoatasi o lo tatou atunuu i lenei tausaga e pei foi ona faia i tausaga taitasi.
O luga o le upega tafailagi a le Fono Samoa NSW Inc o loo faailoa ai o le Cathy Freeman Park o le a faataunuu ai le faamanatuina o le Samoa Day i le aso 12 o le masina nei, le Aso Gafua o muamua ma ua faatulaga e iai faleaiga o meataumafa, oloa ma stalls eseese faapea foi ma faafiafiaga e pei ona faia i tausaga taitasi.
O le tausaga na tea nei na faataunuu ai le sauniga lotu faifaatasi a nisi o ekalesia Samoa i Sini i le Gracepoint Community Church i Smithfield ma ua fuafua o le po o le Aso Sa nei o le a faataunuu ai foi lea sauniga e tapuaia ai ma faafetaia le alofa o le Atua ia Samoa ma lona tutoatasi i nei tausaga e 61.
