E faatāua e le Faatuatuaga Baha’i i Samoa ma le lalolagi agaga o i latou ua fai i lagi le folauga, o le tasi lea o autu o le sauniga faamanatu na faatino e le Faatuatuaga Baha’i i lo tatou atunuu i le Aso Sa lona lua o lenei masina amata o le tausaga fou 2023.
Na faamanatu ai ma le atoaga o le 110 tausaga o le aso na soifua mai ai le susuga i le Malietoa Tanaumafili II sa seei i le tofi Ao o le Malo, ae na tuumalo i le aso 11 o Me o le tausaga e 2007 tusa ai nei ma le 15 tausaga talu ai.
O le aso 4 o Ianuari o le tausaga e 1913 na soifua mai ai le susuga i le Tapaau Faasisina. O le sauniga faamanatu i le maota Tapuai o le faatuatuaga Baha’i na auai sui o le faatuatuaga faapea sui o le Aiga Sa Malietoa.
Mo le silafia o le susuga Malietoa Tanumafili II o le uluai Ao o se malo i le lalolagi na ia talia aoaoga a le faatuatuaga, lea foi na ia talia ai le fausia i Samoa o le Malumalu Tapuai o le Faatuatuaga mo le Pasefika atoa lea na amata fausia i le tausaga e 1984.
Se finagalo o se tasi o sui o le Fono Faaleagaga Tau atunuu a le Faatuatuaga Baha’i i Samoa susuga Aualiitia Lupematasila Safai Arona Mailo.
O se ata video mai taimi o soifua le susuga i le Malietoa Tanumafili II sa tuufaatasia e le afioga Galumalemana Steve Percival na maimoaina e le toatele na auai ma faaiuina ai le sauniga faamanatu mo le Tapaau Faasisina Susuga Malietoa Tanumafili II.
