E lē o malolo lava le faia ai o galuega faatino ma aoaoga a le Australian Federal Police agai mo ana paaga i le Pasefika auā le tetee atu i le faatupula’ia o faiga faasolitulafono i le Atu Pasefika.
E toa 24 leoleo mai atumotu o le Pasefika na auai i lea polokalame tāua.
Mai lea numera e toatasi se sui o le Matagaluega o Leoleo na auai ai, le susuga i le Ta’ita’i Leoleo Asiasi (Inspector) Muagututi’a Paul Taua’a.
I le faatinoga o ia aoaoga na mafai ona faalauaitele malamalamaaga o leoleo i nisi o auala ma tomai i itu tau suesuega e fesoasoani ai i le mataituina ai itu tau seleni, o aseta a i latou o loo aafia i faiga faasolitulafono faavaomalo (Transnational Organised Crime) ma faamausalī o latou tomai i le taofia o ia gaioiga i le Pasefika.
Ua faamauina e le Australian Federal Police le talafeagai o le tuufaatasia o nei aoaoga ma le tulai mai o le tele o mataupu o osofaiga a leoleo o loo maua ai fualaau faasāina i le tele o atumotu o le Pasefika.
O leoleo na auai e aofia ai Samoa, Fiti, Kiripati, Nauru, Solomona, Tonga, Tuvalu ma Vanuatu.
