O le tagata faigaluega sinia lea sa ia vaaia le faagaioia o le faiga ua ta’ua o le Robodebt i Ausetalia, ua faamalolo lē tumau nei mai lana galuega ina ua mae’a faalauiloa mai le faaiuga o suesuega a le komisi suesue i le mataupu.
O Kathryn Campbell e pei ona lipotia i le ABC sa failautusi i le matagaluega o auaunaga tau tagata Human Services i le va o le 2011 ma le 2017.
Na tofia e le faigamalo a le Leipa i le 2022 o se faufautua faapitoa i le poloketi o le AUKUS lea e aofia ai vaamaulu niukilia ma e toeitiiti oo i le 900 afe i le tausaga lona totogi.
O le taeao nei na faamaonia ai e le Palemia e moni ua faamalolo lē tumau e aunoa ma se totogi e maua.
O se faaiuga ua faia e le matagaluega a le Palemia ma le Kapeneta.
Fai mai le komesina o suesuega, Catherine Holmes na iloa e lea tamaitai faamatalaga e faatatau i le lē faatulafonoina o le system sa faaaogā ae leai sana gaioiga na faia iai.
