Ua faamalolo le minisita o femalagaiga, Michael Wood ona o le lē vave faailoaina o loo iai ni ona sea i le malaevaalele i Aukilani.
O le aoauli ananafi na faamautinoa mai ai e le alii Palemia Chris Hipkins o lea ua mae’a faatalanoa le minisita ia Wood ma faailoa foi iai lana faaiuga, ma i saunoaga a le Palemia, e lē faatasi ona fesiligia le minisita i ona sea ua toe faamalolo ai nei.
O sea nei a Wood ua toe faatoese ai ma e faapea o lona talitonuga o loo teu i totonu o le trust.
E ui i le faaiuga a le Palemia ananafi, ae fai mai le taitai o le National Christopher Luxon, sa tatau lava ona faamalolo lē tumau le minisita i le Aso Faraile talu ai ina ua alia’e.
Talanoa ai i sea, o se mataupu o loo laualuga i fonotaga a le Auckland Council i le vaiaso nei a o faia ai lana faaiuga pe faatau ese atu ona sea o loo i le malaevaalele i Aukilani.
Ua maua e tala fou o anapo lea faatoa toe faaopoopo ai e le faletua o le minisita ua faamalolo nei, Julie Fairey o ia foi o se tasi o councillor i Aukilani, le council declaration ma tuu iai e iai sea a lona toalua i le malaevaalele i Aukilani faapea le Contact Energy.
O Michael Wood o ia foi o le minisita mo Aukilani ma o lea o loo ia vaaia poloketi tau i auala agai i le malaevaalele ma o loo telē le fesiligia o lona tutoatasi ona o le conflict of interest.
