I le toe amatalia o galuega i le Aso Lulu ma le tapula’a ai itula faigaluega mai le 9 i le taeao ae manava i le itula e 2, na molimauina le taofia e leoleo o feoaiga a pasi ma taavale laiti faapea taavale a tagata faigaluega ona e tā loa le 2 i le aoauli tapu ona toe feoai tagata ma taavale e tusa o aiaiga o vavao i le laasaga 2 ua iai nei.
Ua fautuaina ai foi e pisinisi ma tagata faigaluega a le Mālō le Komiti o Faalavelave Faafuasei o loo iloiloina aiaiga o vavao ina ia silasila pe le talafeagai ona faaavanoa se lua itula pe a manava galuega i le 2 i le aoauli e saili ai pasi ma auala e toe foi ai i aiga ae le’o le ta loa o le 2pm toso ma le maea ua sa seisi ona toe fealuai e oo i taavale.
Na maua se fesootaiga a le sui o le Radio Samoa i luga o le telefoni ma le Sui Komesina o Leoleo susuga Auapaau Logoitino Filipo ma ia taua ai ua faamanino atu e le Komiti i le Matagaluega e tā loa le 1pm a’o le’i oo i le 2 i le aoauli ona manava lea o tagata faigaluega ma avanoa ai leisi itula atoa e saili ai auala e toe foi ai i aiga.
O le taimi foi lea e manava ai tagata e iai taavale ina ia tā ifo le 2 i le aoauli ua gaogao uma le taulaga ma vaega uma o le atunuu ma amata le vavao o puipuiga o le faama’i ua tapu ai se tagata ona fealuai e oo i taavale seia vagana taavale o loo iai le faatagana ona o tautua manaomia e faaauau pea.
