O lenei mataupu e pei ona fesiligia ai le Sui Faipule a le itumalo o Gagaemauga Numera 2 Seuamuli Fasi Toma le tulaga ua oo iai le fuafuaga o le tuuina atu o le filifiliina o tagata e agavaa mo galuega faavaitaimi i atunuu i fafo i ofisa o itumalo taitasi.

Na tali le Minisita o Pisinisi Alamanuia ma Leipa, Afioga Leatinuu Wayne Sooialo o lea o loo iai le polokalame lenei o galuega faavaitaimi e faamalamalama tulaga ua oo iai lenei fuafuaga.

“O le tulaga i galuega faavaitaimi o lea ua mae’a a taatou faiga faavae ona faatino mae’a faataatia i le Kapeneta lea foi ua aumai ai le maliega ae peitai e tatau ona faailoa atu i lenei itula.

“O le tulaga lea iai ona o le toatele o faalapotopotoga o loo iai i tua poo agencies i inei i le atunuu o loo faaaogaina e i latou e ona galuega i Ausetalia ma Niu Sila.

“O le mea la ua tupu e leai se avanoa a le Matagaluega o Pisinisi ma Alamanuia e mafai ai ona latou faia ni tagata e ave i fafo ona o le tele o requests a galuega mai fafo o loo faatino i Samoa e agents ia e iinei.

“O inā la le mafuaaga lea e mafua ai le ave o tagata o loo faigaluega ave ma tagata e le tatau ona o, ma e pau le tiute a le Matagaluega o latou e faamaoopoopoina malaga ave ma ave loa le maliliega i Niu Sila ma Ausetalia i ofisa ina ia aumai le visa e o ai i latou.

“Lea la ua toe tilotilo iai le tatou faigamalo e tatau ona toe aumai uma recruitments poo le faiga o tagata faigaluega i lalo o le Matagaluega ina ia mafai ai loa ona avatu i tua le fuafuaga lea e ave i tua i ofisa o itumalo.”

Na ia ta’ua ai a lē faatinoina lenei faiga faavae e le mafai a ona tulai mai lenei mataupu i le taimi nei lea o loo auina atu ai ma i latou o loo faigaluega i le taimi nei mo nei avanoa.

“O le isi mea o le tagata e mafai ona alu i galuega faavaitaimi o sē ua leai se galuega i totonu o le 6 masina ae peitai o le aumai ai ma tagata o loo faigaluega i le taimi lena ua lē talafeagai lea ma aiaiga.

“O lea ua iai le faiga faavae o loo faataatia mo le silafia o lea o le a faatino loa i tua i itumalo le aoina mai o lisi ma tuuina mai i le matagaluega e faasoa ai i kamupani ia o loo mananao mai.

“Ona ua le mafai ona control ona o le mananao mai o kamupani ia latou agents e faatino e latou tulaga lea.

“Ae o le mea e tupu a iai la se tulaga e alia’e mai atunuu o loo iai o tatou tagata nei e le o la i agents ia ae omai i le Malo.

“Masalo o le masina fou poo le faaiuga o le fonotaga lenei ua maua ai loa tulaga lea ma faasafua atu ai loa i tua i itumalo ae se’i fai se fuafuaga i agents nei ona o iina lea e taatia mai ai le faaletonu.”