Ua iai le popolega o le aafia o uta container fela’ua’i i totonu o le atunuu i le mae’a ai ona sau o le faaiuga a le kamupani tele a le Maersk o le a faamuta i le masina fou ana auaunaga ua ta’ua o le Coastal Connect.
O le Coastal Connect o le auaunaga o loo feoai ai vaa lauoloa e lua a le Maersk i le va o uafu i Aukilani, Tauranga, Timaru, Nelson ma Lyttelton i vaiaso taitasi ma o se auaunaga faatoa amata i le masina o Iulai o le tausaga talu ai.
O loo fesoasoani tele lea e le gata i tagata faatau a o pisinisi ma le maketi o fefaatauaiga.
O lea foi o loo maua ai galuega a le tusa ma le 60 tagata Kiwi.
Peitai o le faamavae mai ai o le kamupani feaveai container mai le maketi a Niu Sila, ua o se faanoanoaga lea e le gata i galuega o le a aafia ai, ae o le tamaoaiga o Niu Sila ma e le taumate o le a aafia ai foi ma le tau o oloa ma auaunaga.
O lea e lei atoa se tausaga a ua toe faamaamulu le kamupani tele a le Maersk, ma ua fai mai ai e le faapea ua mafua ona o le taumafai e paketi tupe a le kamupani peitai o le naunautaiga ia faaleleia atili auaunaga mo paaga.
O auaunaga e le toe mamao faamuta i totonu o Niu Sila o le a suia lea i fela’ua’iga i le va o Niu Sila ma Ausetalia.
