O le toe foi atu i Niusila o le toatele sa malaga mai mo tafaoga o le Kerisimasi ma le Tausaga Fou sa fa’aaoga ai le tautua a va’alele o le Air New Zealand, o nisi sa foi atu i malaga a le kamupani vaalele a Fiti, ona o faaletonu sa tulai mai i se tasi o malaga i le tau amataga o le vaiaso nei.
Fa’aalia i se lipoti a le vaega faasalalau o le MerMada Pacific, e 164 le pasese na aafia ai.
O le malaga sa faamoemoe e tuua Samoa i le 15 minute i le 9 i le po o le Aso Lua, ae na ave pasese ma faamautū i nisi o faletalimalo ina ua faailoa e sui o le kamupani va’alele le iai o ni faalētonu le ma’alofia i le vaa.
Sa toe mafai ona foi le va’alele i le po lava lea ae sa na o pailate ma le ‘auva’a ae nonofo uma le pasese, lea sa maua avanoa o nisi i le malaga a le va’alele a Fiti i le taeao o le Aso Lulu a o isi na maua avanoa i le malaga a lea kamupani va’alele i le afiafi o le Aso Lulu.
Fa’aalia i le lipoti e iai foi se isi malaga a le Air New Zealand mai lo tatou atunuu talu ai nei sa tulai mai ai foi se faalētonu i le va’alele ma tuai ai ona malaga ese ma le malae va’alele faavaomalo i Faleolo.
O le taimi pisi lenei i malaga a vaalele mai lo tatou atunuu ona o nisi sa fai malologa mai o le a toe foi atu i atunuu o loo aumau ma faamautū ai.
O le tausaga nei i le masina o Iuni ua faailoa e le kamupani va’alele o le Quantas a Ausetalia o le a amata ai ona faia ana malaga mai Aukilani mo Samoa.
O le a to’alua ai ma le kamupani vaalele o le Air New Zealand.
