O le polofesa i le mataupu o le Biochemistry i le Iunivesite o Otago, Kurt Krause ua lipotia i le vaiaso nei sana faamatalaga e iai mafuaaga e tatau ai ona popole tagata Niu Sila e faatatau i se ituaiga siama ua maitauina ua oo mai i le atunuu e igoa o le candida auris.
Ta’ua e Krause o le itu lelei ona e le ono tulai mai ai se pandemic pe pepesi faalauaitele i tagata ae o lana lapataiga e ono tulai ai ni faafitauli.
Fai mai o se taimi e lei mamao atu na maitauina ai ua oo mai lea ituaiga siama i Niu Sila ae mātele ina maua i le malo tele o Amerika ma ua faailoa e le soifua maloloina o loo latou mataituina lea mataupu.
Ua faailoa i le lipoti a le Newshub i le asō ua faaigoa e Amerika lea siama o se faamata’u urgent threat ona e foliga e vave tele ona aafia ai nofoaga tau le soifua maloloina ma iu ai ina afua mai ai se isi faamai e ono aafia ai soifua.
Na saunoa Krause o mafuaaga e tatau ai ona faaetete tagata i lea siama fou ona e mafai ona ogaoga ona aafiaga, itiiti se aogā iai o togafitiga e masani ona faia i siama, faigofie ona le maitauina sei vagana e lapataia potu suesue aemaise o le aofai o tagata aafia, mo se faataitaiga i Amerika lea ua toeiitit 6 afe cases i le tausaga.
Pau le tulaga lelei e pei ona ta’ua e Krause ona e foliga e le agai lea vairusi poo le siama foi i tagata o loo soifua maloloina ma ua ia faailoa foi o le lamatiaga aupito tele mo Niu Sila pe afai e nofo le siama lea i nofoaga e pei o ICU ma nofoaga tausi soifua.
O loo ta’ua i lea lava lipoti o āuga e suisui lava e fua i le vaega o le tino e aafia i le siama ae o āuga taatele e aofia ai le fiva soo ma faamaalili.
