Ua faaleo faanoanoaga o mātua o le alii talavou ia Tuuau Maletino i ni tusi ua tuuina atu i le Tamaitai Palemia le isi ae o le Ofisa o le Komesina o Sulufaiga le isi i suesuega o le maliu o Tuuau.
O ia tusi o loo ta’ua ai vaega sa tutupu i le faatoa uma ai o le maliu o lea talavou i le tausaga 2021.
Na faailoa e mātua e lei iai se taotoga faapitoa na faia i le tino maliu o le la tama, o se mea ua fesiligia ai le pepa maliu sa faia, o loo iai faaupuga na mafua le maliu ona o se faalavelave tau taavale, peitai e oo mai le taimi nei e lei iloa le mafuaaga o le maliu o Tuuau.
O loo faaseā foi mātua i le toe faatino ai e nisi o le Matagaluega o Leoleo o le suesuega i le maliu o la la tama ae o loo iai tuuaiga.
E lē gata i lea o le sootaga o i latou o loo taiulu iai suesuega lea o loo ta’ua ai le Susuga Papalii Efo Moalele i lona toe faia o le suesuega ae o le tausoga o lē sa taiulu i le uluai suesuega o le mataupu i le 2021 le Sui Komesina ia Papalii Monalisa Tia’i Keti, lea o loo tele iai faitioga.
O le leiloloa o lavalava o lē ua maliu atoa ai ma le toe agai atu o leoleo i mātua e manaomia ni faua (tulou) mo a latou suesuega i le aso 16 o le masina nei.
Ua fesiligia ai pe lē o le tulaga lea sa tatau ona faia i le uluai taimi faatoa uma ai na tupu le faalavelave ma faagasolo suesuega a leoleo.
O le talosaga a mātua i le Tamaitai Palemia ma le Kapeneta ina ia silasila ane i suesuega a leoleo ua matuā fesiligia le amiotonu.
Ua faailoa le faanoanoaga ona o le leai o se faaiuga lelei o le mataupu ma faagata ai lagona mafatia ia te laua.
Faailoa e mātua o Tuuau o le tele lava o faasalalauga i le mataupu lenei o le tele foi lea o mafatiaga ona o le igoa o la la tama o lo fetosoaina ai i nei mau tala.
