O se mataupu ua leva ona finauina i luma o le faamasinoga maualuga e ala i le sailia o le tonu ma sa’o i le mataupu o le nofoa faaopoopo o tamaitai ile Palemene.
O le taeao nei la lea na tuuina aloaia mai ai loa e le faamasinoga maualuga le iuga o le mataupu e ala i le talosaga apili poo le Stay of Execution a le Ofisa o le faigapalota ma le afioga ia Aliimalemanu Momoemausu Moti Alofa Tuuau ina ia taofia le iuga o le faamasinoga na tuuina mai i le Aso 17 o Me 2021 e faaleaogaina ai le nofoa faaopoopo.
O lea faaiuga ua faaleaogaina ai le taofia lea o le faaiuga muamua a le faamasinoga ma ua toe faafoi ai le malosiaga o le faaiuga na tuuina mai i le Aso 17 o Me e soloia ai le nofoa faaopoopo.
Na faalia ai le fiafia tele o sui lagolago a le FAST ona o le faaiuga ma o le a faagasolo ai loa a latou fuafuaga ua leva ona faataatitia.
O le aso Gafua 24 o Me lea e fuafua e ono tauaofia ai le Palemene o Samoa ma faatautō ai loa se faigamalo fou e taitaia le atunuu. O le aso Gafua foi e atoa iai le 45 aso talu ona maea le faigapalota a le atunuu lea na faia i le Aso 9 o Aperila 2021.
