O le tusi ua faaigoaina My Cousin Is a Chief in Samoa na tusiaina e se tusitala Denmark o Johannes Langkilde e faatatau lea i lona aiga i Samoa.
O lenei tusi na fofoa mai i se tasi o ona aiga Hans Alfred Langkilde, na malaga ese mai Denmark i le 17 o senituri i Samoa ma faaipoipo ai i le alo tamaitai o se tasi o tamalii o le atunuu ma o lea e iai lona sootaga i Samoa nei.
Na ia ta’ua ai le mafuaaga na ia tusia ai lenei tusi.
“O le autu tonu lava sa ou mafaufau e tusi ai le tusi lenei e faatatau i lo’u sootaga i Samoa, na ou auai i se tasi o fonotaga i Amerika i le 2016 o i sa ma feiloai ai ma lo’u tausoga Fagafaga Daniel Langkilde ma fai ai loa le tonu matou te malaga mai ma lo’u aiga e asiasi mai i Amerika Samoa.”
“I taimi a o faia a’u suesuega ia Hans Alfred Langkilde na ou manatu ai e tusia ai le tusi e faatatau ia te ia ae peitai i le malaga mai i Samoa i lena vaitaimi na ou manatu ai loa e faatatau lenei tusi i lo’u tausoga ia Fagafaga ona o la’u maitau ma vaavaai foi i le aganuu a Samoa ma tiute fai a lo’u tausoga lea o loo faatino i lona aiga.
“Na aoaoina ai a’u i le tu ma le aganuu, o le matafaioi a le matai i lona auaiga o loo tusia ai i totonu o lenei tusi, o se vaega tāua lea o lo’u olaga ona o le eseesega o le olaga o loo o’u ola ai lo’u atunuu ma atunuu e pei o Samoa.”
O lenei tusi na muamua ona tusia i le gagana Danish ma le gagana Siamani ae o loo ua iai nei le lomiga i le gagana Peretania e pei ona faalauiloa ai e Langkilde.
“E toatele tagata ua amata ona faitau i lenei tusi i lomiga i isi aganuu na tusia muamua ai ua aumai feau tusitusia i lenei foi taumafaiga, o le fiafiaga lava ona ua taunuu lenei faamoemoe sa tautiga ma tele foi se taimi na faatino ai ina ia tino mai ma e iai le naunautaiga e le gata ai iinei le tusiaina o ni tusi e faalauiloa ai Samoa i le lalolagi.
“O le naunautaiga lava ina ia avea lenei tusi ma auala e momoli ai le feau i soo se tafa o lenei lalolagi ma faalauiloa ai Samoa ma lana aganuu, o le mea moni o loo iai nisi na o latou ta’ua ina ua mae’a faitau lenei tusi ua faaosofia ai le faimalaga atu i Samoa e tafafao ma maimoa ai.
“E tele ina ou faia lenei tala i tagata matou te faasoa i lenei tusi, ‘everybody deserves to visit Samoa and American Samoa at least once in their lives’.”
