O le Seventh Day Adventist Samoa & Tokelau Mission ua faalauiloaina nei le faatautaia ai o se fonotaga faalesoifua maloloina e amatalia i le Aso Faraile nei.

O lenei fonotaga i se pepa o faamatalaga mai le S.D.A. Samoa & Tokelau Mission o le lagolagoina lea e tusa ai o se asiasiga a le Peresitene o le ekalesia i le Pasefika, Glenn Townend i le amataga o le masina ua mavae nei na maua ai le avanoa e feiloai ai i le Palemia o Samoa ma faailoa ai lona popolega i le itu tau le soifua maloloina.

O le auga lava o lenei fonotaga ina ia folasia mataupu tāua i le vaega o soifua maloloina ma ia faatino se auala e tatala ai manatu ma lagona o i latou o loo feagai ma nei auaunaga, sui o nuu ma afioaga aemaise paaga o loo galulue i lona manulauti ua tapenaina.

O le a agai lenei fonotaga ina ia saili fofo, faamautu faigapaaga ma faalauiloa faalauaitele tulaga tau le soifua maloloina e le gata i vaega eseese o le atunuu aemaise totonu o ekalesia.

E pei ona faaalia ai le agaga faafetai o le Peresitene ia Townend i le faasoa o manatu e uiga i faafitauli o le soifua maloloina o le atunuu ma ia faamanatu ai le lagolagosua atoatoa a le S.D.A. Samoa & Tokelau Mission i le Malo o Samoa e ala i ana taumafaiga mo le soifua manuia o ona tagatanuu.

O le aso a taeao lea o le a feiloai ai ma tusitala ma le aufaasalalau e faama’oti nisi o vaega mautu a o lei amatalia lenei fonotaga.