O le vaiaso lenei, na faalauiloa aloaia ai nisi o vaega tāua mo tapenaga e aofia ai faailoga faamauina (logo) ma le upega tafailagi mo le fonotaga a ulu o Malo o le Taupulega o le a faia mai Samoa.
E 56 atunuu o le lalolagi o loo i totonu o Malo o le Taupulega, ma i lea fainumera e 9 atumotu o le Pasefika o loo aofia ai.
Ma o le fonotaga o le a talimalo ai Samoa i le masina o Oketopa o le tausaga nei, o se taimi muamua lea o le a talimalo ai se atumotu o le Pasefika i lea faamoemoe.
I le saunoaga autu a le Tamaitai Palemia, Fiame Naomi Mata’afa na ia ta’ua ai e tele ni mataupu o le a faatalanoaina i lea fonotaga mo le alualu i luma o atinae mo le manuia lautele o tagata o atunuu o Malo o le Taupulega.
O le upega tafailagi na manumalo ai le kamupani telefoni o le Vodafone i tauofoga ma o i foi o le a amata faalauiloa ai vaega uma o le fonotaga, ae o le faamau faailoga na manumalo ai le alii e galue i le Matagaluega o Aoga ma Aganuu o Tauila Epati Tuumatavai.
Toe 6 masina ona faataunuuina lea o le fonotaga tele, ma e lē gata i vaega tāua na faalauiloa aloaia i le aso, ae o loo tele foi isi vaega o loo tapena iai le malo e pei o le toe faaleleia o auala e amata atu i le talafatai i Apia ma isi vaega uma o le atunuu.
O lea fonotaga o le a auai mai ai le Tupu o le malo tele o Peretania ma lana Masiofo.
O isi tapenaga i tulaga tau i le saogalemu o loo taulamua ai le Matagaluega o leoleo, ma e toa 300 alii ma tamaitai faiaoga o le a galulue i lea lava aso.
O le aso 21 i le 25 o Oketopa o le a amata faagasolo ai lea fonotaga.
