E 200 kopi o le tusi ua mae’a tusia i le gagana patupatu mo i latou o iai manaoga tumau e faapitoa lea mo le asosi o i latou e po le vaai.

O lenei tusi ua mae’a lomiaina i le gagana Samoa ma le Gagana Peretania ma o loo lomia ai faatinoga ma auala e tali atu ai i faalavelave matuia mo i latou e po le vaai.

O le taeao nei lea na faataunuu ai lenei faamoemoe ma na saunoa ai le Sui Ofisa Sili o le Matagaluega o Siosiomaga, Moafanua Tolusina Pouli o lenei faamoemoe ua faailoa manino ai le anavatau a le Malo ina ia aofia uma tagata i galuega faatino ma taumafaiga.

“O se atina’e e faamaonia ai le agaga e faatāua ai le aofia o i latou e iai aafiaga tumau o le soifua i lo latou sao i soo se atina’e a le Malo.

“O le faalauiloaina aloaia o le uluai faamatalaga atoatoa mo faatinoga e tali atu ai i faalavelave matuia i le gagana patupatu mo le silafia mo i latou e po le silasila.”

O le tauaofai o lenei faamoemoe e tusa lea ma le $30,500 ma sa faatupeina e le Malo o Niu Sila e tauala mai lea i le Vaega o Faafoeina Faalavelave Faafuasei i Niu Sila o loo lima taitaiina i le vaega o faalavelave matuia i le Pasefika.

Na faailoa ai e Pouli o le agaga fiafia foi ona o le faigapaaga a le Matagaluega ma le faalapotopotoga o i latou o iai manaoga tumau aemaise le asosi o i latou e po le vaai.

“E faafetai nei faalapotopotoga i le faasoa mai ai o le tomai ma le agavaa ma tuuina mai le tau’au e faatino ma tuufaatasia ai lenei tusi, o meafaigaluega mo le lomiga ma le faaliliuina i le gagana patupatu.”

O le mae’a ai o le faamoemoe i le asō na tuuina ai loa nei lomiga mo le asosi o i latou e po le vaai ma o nei taumafaiga uma o loo faailo ai pea le tausisia e Samoa o faamoemoega ma galuega fuafuaina e le lalolagi e pei ona iai i le taiala a le lalolagi mo faalaelave matuia 2015-2030.