O le polokalame lenei o se avanoa mo tina faipisinisi i Samoa nei o loo lagolagoina e le Malo o Amerika.
O le sini autu ina ia mafai ona siitia le tulaga i tomai ma agavaa o tina ma tamaitai faipisinisi ae le gata i lea o auala e mafai ai ona fausia faigapaaga ma nisi pisinisi faapea lo latou sao i le atina’eina o le tamaoaiga o le atunuu.
I pepa o faamatalaga mai le Ofisa o le Malo o Amerika i Samoa nei na faailoa ai, a mae’a lenei polokalame o sui o le a auai ai o le a avea i latou ma uluai vaega o lenei polokalame i Samoa nei.
O lenei fesoasoani mo tina ma tamaitai o loo faagasolo lea i isi atunuu ma o le unaia o tina ma tamaitai ina ia faaaogāina metotia e talafeagai ma le atina’e o le pisinisi aemaise le tomai.
O lenei polokalame o le a faatautaia lea e se tasi o tina faipisinisi o Adeline Mose o lē o loo Pule i le Makeki Online ma nisi ua iloga lo latou sao i le itu tau pisinisi i Samoa nei.
Na ta’ua e le sui o le Malo o Amerika i Samoa ne,i Noriko Horiuchi o lenei avanoa e tāua tele mo le faafaileleina o mafaufau faipisinisi o tina ma tamaitai i Samoa nei.
“E faamalosiau lenei polokalame i sui auai ina ia faaogā tatau le avanoa e talatalanoa ma faasoa ai ma isi sui, o metotia ma auala e fesoasoani ai i pisinisi e mafai ona maua atu uma e ala i le faasoa ma talanoa.
“E aogā foi e iloa ai auala e faaaogā e foia ai nisi o faafitauli o loo feagai ma le tele o pisinisi.”
