Ua mae’a nei tapenaga a le Matagaluega o Puna’oa Faalenatura ma Siosiomaga ma nisi o kamupani i le atunuu ma ua mae’a ai ona fausia le nofoaga muamua i Samoa o le a fafaga ai maa o taavale e ola i le eletise e maua mai malosiaga faafouina e pei o le eletise mai lā.

O tua ane o le maota o le Malo i le eleele fou i le vaega o loo iai le nofoaga o le Friendship Park ua faatū ai lea nofoaga ua mae’a faalauiloa ma le faamoemoe e amata faaaogā i le masina fou o Iulai.

O se tasi lea o taumafaiga a le Malo e avea ai ma sao o Samoa i taumafaiga uma a atunuu o le lalolagi e faaitiitia le faaaogāina o suauu o loo ola ai masini ma taavale ma mafua ai kasa oona o le kaponi o loo pua’ina atu i fafo ma faaleagaina ai le lalolagi.

Faaalia e le Minisita o Puna’oa Faalenatura ma Siosiomaga le afioga Toeolesulusulu Cedric Schuster i le tatalaina o le nofoaga e fafaga ai maa o taavale e ola i le eletise, e lua ni fagamaa poo charging stations ua saunia ma e mafai ona fafaga ai taavale alu i le la, e ta’i 6 itula ae mafai ona fealua’i ai mo le silia i le 300 kilomita.

O se ata faataitai, pe tusa ma le silia i le $200.00 le tupe e faasaoina ai, mai le faatau o le penisini e alu ai se taavale.

O lea atina’e e fafaga fua uma ai taavale e alu i le la mo le tausaga atoa.

E 240 afe tala Amerika na faatupe ai le faatūina o le nofoaga muamua i Samoa e fafaga ai maa o taavale e ola i le eletise.

Ua iai nisi o matagaluega a le Malo ma tagata taitoatasi i Samoa ua latou aumai taavale e ola i le eletise.