O le iuga o se tasi o suesuega fou ua faalauiloa mai i le vaiaso nei ua ta’ua ai o loo maualalo pea le aofai o fomai Pasefika ma Maoli o loo iai fua i lo latou faitau aofai i totonu o le atunuu.
Lipotia e le One News e ui i le tele o le mau tausaga sa taumafai ai le faaopoopoina o le numera o fomai Pasefika ma Maoli peitai e foliga mai o loo maualalo lava lea aofaiga pe a fua i le faitau aofai o tagata.
I le tausaga lava lenei 2023 o le aofai o fomai Maoli i Niu Sila a tuufaatasi pe na o le 4.7 pasene lea o le aofaiga atoa o fomai i le atunuu peitai pe a faatusa i le pasene o tagata Maoli e tautuaina e ia fomai e matuai maualalo lava.
O le aofai foi o fomai mai le Pasefika o loo faatupulaia peitai e na o le 2.2 foi pasene o le faitau aofai o fomai e mai le Pasefika ma o loo matuai maualalo foi pe a faatusa i le faitau aofai o tagata Pasefika i Niu Sila.
O nisi tulaga ua faailoa i le suesuega lea ua ta’ua ai o le mativa o se tasi lea o pa pupuni o le faia o suesuega i mataupu tau togafitiga i kulupu ia ma o se tasi lea o mafuaaga o le toaitiiti o le numera o i latou e faatinoina ia suesuega.
