O le faalauiloaina o fuafuaga a le vaega ma’oti o fela’ua’iga ma atina’e tetele mo le isi lima tausaga auā ana galuega faatino. 

O le Minisita e patino ai lenei vaega Afioga Olo Afoa Fiti Vaai na saunoa ai e tusa o le faamoemoe. 

“O lenei Fuafuaga o loo mulimulita’ia lava alafua faataatitia o le Ta’iala mo le Lumana’i Manuia o Samoa (Pathway for the Development of Samoa FY2021/22 – FY2025/26), ina ia manino le sao o lenei Vaega Ma’oti i Ta’iala Autu ua faataoto ma Vaega faamuamua o loo limata’ita’ia ai le atina’eina o si o tatou atunuu.

“O lenei fuafuaga e taula’i i le talitonuga; a mausalī faamalieina ma mautinoa sootaga faigofie i fela’ua’iga i le eleele, sami ma le vanimonimo i a tatou atina’e tetele, ona le pine lea lo tatou ausia o le sini autu e pei ona tulituliloaina – Ia faaagavaaina alalafaga i metotia fou, faamausalī le lotoifale, ma faama’ite le faatupula’ia o le tamaoaiga i soo se itu o le soifuaga o tagata uma o Samoa, ina ia leai se tasi e tuuaunoaina.

“O lenei Fuafuaga o loo faamanino ai lenei Vaega Ma’oti ma le li’o o ana auaunaga faapea ma Matagaluega & Faalapotopotoga, Pulega a le Malo ma Paaga uma e fai sao iai.

“O loo aofia ai foi se iloiloga o le tulaga na iai galuega faatino na faataoto i le Fuafuaga Mamao mo Fela’ua’iga ua tuanai atu.” 

O le faamoemoe laualuga, ua faailoa atu i lenei Fuafuaga a matou galuega mo le isi lima tausaga, faatasi ai ma galuega sailiili mo le atina’e mamao o fela’ua’iga ma atina’e tetele mo le lumanai manuia o si o tatou atunuu. 

“Ua mae’a foi ona tapenaina le faavaa e fuatia ai le tulaga o le a iai faatinoga faatasi ai ma ona tupe moomia mo le faatupeina.

“O le fiafiaga sili ua mae’a ma faamaonia e le Kapeneta lenei fuafuaga.

“E lei faigofie lona tapenaina ona o le tele o isi galuega faatino a le aufaigaluega.”

Na ta’ua e Olo o le fuafuaga lenei sa faatino lava e le aufaigaluega i lalo o le taitaiga a le Matagaluega o Galuega, Fela’ua’iga ma Atina’e Eseese faatasi ai ma le lagolagosua iai a faalapotopotoga ma pulega o lenei vaega ma’oti ma le sao o ana paaga aemaise sui mai afioaga. 

“O se luitau ua amata mea ai lenei vaega i fuafuaga tetele faapenei, o atina’e a le malo ina ia faaaogaina ai tomai ma agavaa, o meaalofa a le Atua o loo i o tatou lava lima.

“O se laasaga lenei ua leva ona tatau ona tatou oo iai.

“O le faasaoina ai o tatou tupe mai le aami mai pea o tagata mai fafo e faatino a tatou galuega faapenei.”