O lea ua mae’a faalauiloa e atunuu e pei o Papua Niu Kini, Fiti, Tonga ma Samoa a latou ‘au mo le Ipu o le lalolagi i le taaloga lakapi liki. Ua faailoa e le RNZ Pacific i le asō o ‘au nei o loo tumu i tama taaalo iloga a le NRL ma o nisi o i latou ia ua o latou teena ofo na tuuina ane mai ia Ausetalia ma Niu Sila.
O le faaiuga a le alo o Samoa Joseph Suaalii sa faia e taalo mo le Toa Samoa mo se faataitaiga, sa lāgā ai finagalo lē fiafia o se tasi o tagata faasalalau i taaloga, Paul Kent mai le Newscorp e faapea ua mananao alii taalo ia e maua tupe e taaalo ai mo le State of Origins ae le fia taalo mo Ausetalia.
O ni faamatalaga sa faailoa ai foi le lē auai ai o isi foi alii faasalalau Ausetalia sa faatalanoaina le mataupu lea i luga o le televise, na o latou ta’ua ai o loo i le tama taalo lava lana faitalia i le ‘au e taalo ai ma e faaaloalogia foi le faaiuga ua o latou faia e taalo mo atunuu o o latou tupuaga.
Mo le Toa Samoa lava ia o loo faamautu i Doncaster ma o le a taaalo ma Egelani e talamalae i nei taaloga.
