O le ata poo le faailoga faamauina lea o le a vaaia i le tele o vaega o le atunuu aemaise lava o tapenaga mo le Fonotaga a Taitai o Malo o le Taupulega ia Oketopa o le tausaga nei.
O le faailoga o le ata o se fuagalaau felanulanua’i.
Faaalia e le Ofisa Sili o le Matagaluega o le Palemia ma le Kapeneta, o le fugalaau o loo atagia mai ai le omai faatasi o taitai o malo e 56 o le Taupulega, ia fausia se lumanai mautu,e gafataulimaina ma fefaasoaa’i mo atunuu ma tagata lautele o le lalolagi.
O le li’o lanu moana o loo i le ogatotonu o le fugalaau o loo faatusa i le Pasefika lanu moana e fesootai ai o tatou ogasami, o laufanua lanu lauava o le a mafai ona molimauina e Malo o le Taupulega.
O isi vaega o le faailoga e toe tomanatu ai i le amataga sa taumafai mai ai nai o tatou tagata ma seia oo mai i le tele o suiga ma fuafuaga ua ausia i le taimi nei.
O lanu eseese o laulaau taitasi o loo faatusalia i fono taitasi, e aofia ai fono a tupulaga talavou, fono a tamaitai, fono a tagata lautele ma fono a pisinisi a Malo o le Taupulega.
O lea faamau faailoga sa tusia e le alii o Tauila Epati Tuumatavai mai le Matagaluega o Aoga ma Aganuu.
