E maoa’e le matagofie o ie ua eleiina faapea le tele o taumafataga sa gaseseina lava e fanau talavou o le ekalesia EFKS East Tamaki lea sa mafai ona tuufaatasia ai se polokalame a lea autalavou i le Aso Faraile le aso malolo o le Matariki. 

O se avanoa na faalauiloa ai le manaia o lanu eseese o elei, faatasi ai ma le felanulanuai o meaai eseese na tapenaina lava e fanau talavou. 

O lenei faamoemoe o se polokalame sa taumafai iai le tina o le galuega le faletua ia Mafa Futi e a’oa’o nai fanau talavou ia iloa ona fai elei ma kuka meaai auā le manuia o fanau i totonu o aiga ma ekalesia. 

E fā vaiaso na galulue ai le autalavou e fai elei o ie i ona lanu eseese, a o meaai sa faatinoina lava i le aso na faatinoina ai lenei faamoemoe. 

O le taimi muamua lenei ua faia ai se maketi a fanau talavou ae se’i agai atu le mamalu o le atunuu e maimoa i taumafaiga a le fanau ma se’i tofo i meaai eseese.  

Na faatumulia le hall a le ekalesia EFKS East Tamaki i le mamalu o le atunuu sa agai atu ma molimauina lenei polokalame e lē gata i lea o susuga i ta’ita’i o Local Boards a Otara ma Papatoetoe, o susuga i faafeagaiga mai isi ekalesia o tamafanau a Samoa o loo galulue i le matagaluega a leoleo ua maualuga ma mati’e ai le faamoemoe o fanau autalavou. 

Sa iai meaai se tufa fua i lea aso e pei o le bbq sosisi, o le vaimago ma le koko Samoa sa tali ai le mālū taeao a le mamalu o le atunuu. 

Sa iai galuega a nisi o talavou e ala i le fufuluina o taavale ma o nei fuafuaga uma o le taumafai lea ia tuufaatasia le loto galulue o fanau talavou. 

O le susuga ia Li’amanaia Lorenzo Kaisara sa fai ma fofoga o le polokalame.   

E lei leva ona amata le faamoemoe ae maitauina le vave o le alu o meaai na faatauina e tagata. 

Sa iai le tele o faailoga na tapenaina e le autalavou na faatinoina ai se se’i auā le mamalu o le atunuu.