O le tali faaaloalo a le Malo ua tapena e faia i le faletalimalo o le Taumeasina Island Resort i le afiafi o le Aso Faraile le faaiuga o lenei vaiaso, o le a faailoa ai se meaalofa tupe mo tama ma le pulega o le Toa Samoa.
Na fesiligia le Minisita o Tupe ina ua maua iai se avanoa, i le mae’a o le sauniga na faafeiloai ai le aulakapi liki a le atunuu, po ua faamautu le aofaiga o se seleni mo lea fuafuaga, ae na faailoa mai e le Minisita le afioga Mulipola Anarosa Ale Molioo, e lei faamautuina le aofaiga o se meaalofa, ae o le a iloa pe a faia lea tali faaaloalo o se fiafia ma se taumafataga o le afiafi i le faletalimalo o le Taumeasina.
Ua mae’a ona faailoa muamua le meaalofa a se tasi o totino o le Malo le SIFA poo le Samoa Finance Authority, e limaselau afe tala, ua faaalu se vaega o lea seleni e silia ma le 300 afe e totogi ai pasese o le malaga mai o le Toa Samoa ma sui o le pulega e aofia ai le faiaoga.
Na faamautu foi lea foai e le Peresetene o le Lakapi Liki a Samoa i se feiloaiga ma tusitala i lenei vaiaso.
