A o toesea ai ma le atunuu le taitai o le Malo i lana siiga gasegase i Niu Sila, ua faailoa i se pepa o faaiuga a le Kapeneta le faamaonia o lea fuafuaga i le fono o le aso 21 o Tesema o le tausaga na tea nei, i le mafuaaga e le mafai ona faia togafitiga i Samoa.
Faaalia i lea faaiuga o togafitiga o le taotoga o le Palemia e faatupe i le polokalame o loo ave ai gasegase i fafo seia vagana nisi o vaegatupe o loo faatupe e le Matagaluega a le Palemia ma le Kapeneta ma le Matagaluega o Va i Fafo ma Fefaatauaiga.
O pasese o le vaalele mo le Palemia ma le Ofisa Sili lagolago o le matagaluega o le va i fafo ma fefaatauiga o loo malaga ai e tusa ma faiga faavae a le Malo ua faaalu ai le $4,579 tala Samoa, ma alauni ma isi mea laiti ua faaalu ai le tasi le afe tala Samoa.
I totonu o Niu Sila ua faatulaga ai le vaegatupe e $5,637 ma le 50 sene tupe Niu Sila.
O le tu lata i le faaiuga o le masina nei o Ianuari ua faamoemoe e toe taliu mai ai i fanua le tamaitai Palemia le afioga Fiame Naomi Mataafa.
