I le Pasefika ua faa‘afa uma tagavai o atunuu o le Pasefika e faailoa ai lo latou faaaloalo i le Tupu Tamaitai ua tuumalo.
E pei ona silafia e le toatele na asia e le Tupu Tamaitai le Pasefika mo ni nai taimi a o nofoia pea le nofoa ma o malosi foi lona soifua.
Ua lipotia e le RNZ Pacific nisi o faamaisega ua agiga i le taimi nei mai le Pasefika agai i le Tupu Tamaitai, o le Atu Kuki ua taua e le palemia o Mark Brown o le a faia se aso faapitoa e faailoa ai le faanoanoa o le atunuu ma o le a faa‘afa uma foi tagavai o le atunuu e faailoa ai le faaaloalo.
I Fiti ua faailoa e le palemia o Bainimarama ua mafatia ma mamafa loto o tagata o lona malo i le tala ua maua.
I Tonga ua saunoa le purinisese Frederica Tuita e tele ma anoanoai mea o le a manatua ai e lo latou aiga le Tupu Tamaitai ma o le a iai faatasi le malo o Tonga ma le faitau miliona i le lalolagi o le a faailoa le faanoanoa i le maliu o le Tupu Tamaitai.
O le premier o Niue o Dalton Talagi na ia saunoa foi e faataua le faamaonia o Elisapeta i le faatinoina o ona tiute ma le alofa i ona tagata.
Fai mai le matagaluega o le va i fafo a Tuvalu e taua ia i latou le umi o le nofoaiga a le Tupu Tamaitai ua 70 tausaga ma ailoga a toe faaluaina e se tasi.
O le sui o le malo o le Atu SOlomona, faipule o Peter Keniorea na ia faamatala le tausaga 1982 na faauu ai e le Tupu Tamaitai le avea o lona tama ma Knight ina ua malaga atu i lo latou atunuu ae faatoa 10 ona tausaga.
O le French Polynesia ua faailoa e lo latou peresetene o Edouard Fritch o le soifua o Elisapeta ua faailo i le talaaga o le lalolagi ma sa afea foi e le Tupu Tamaitai lo latou atunuu i le 2002, o se tamaitai tausaafia tele.
Mai Hawaii ua faailoa e le kovana o David Ige o le a manatua pea le taitaiga a Elisapeta ma ua faanoanoa atoa foi lona atumotu ona o le tala ua maua mai i le asō.
