Na faailoa e Vui Masinamua i le Faamasinoga o Perkins o ia lava lea o Salote Syrah Tautai e onaina le lautusi i le facebook o loo iai tala faalumaluma ma faamataga ai le Tamaitai Palemia ma isi Minisita o le Kapeneta.
O Vui na lona fa iai molimau o le mataupu o loo suesueina nei i le Faamasinoga i moliaga e 25 faasaga i le tamaitai o Perkins Feagiai Headle i lona faia lea o faamatalaga mataga agai i le Faigamalo o tulai mai nei.
Na faatautaia le molimau a Vui mai le zoom ona o loo i Niu Sila mo ana siaki faalesoifua maloloina.
Sa ia faailoa i le Faamasinoga o ia e aiga ma Perkins poo Salote i le afioaga o Vaitoomuli i Savaii. O le 2014 na faatoa masani ma iloa lelei ai e Vui le tamaitai o loo tuuaia nei i lana polokalame i luga o le leitio e faaigoaina o le Le Foafoa Samoa Radio i Ausetalia.
Sa ia ta’ua o Perkins o se tasi o tagata e masani ona faaali atu ona manatu (comment) i luga o lana polokalame.
Na foi mai Vui i Samoa ina ua litaea mai le letio, ae o le tausaga na mavae na toe foi ai i Ausetalia ma toe asia ai le leitio. Sa ia faia se polokalame live i luga o le letio i lea taimi.
Na ia ta’ua a o faagasolo ai lea polokalame na ia vaaia le igoa o Salote Syrah Tautai, ma sa ia faatalofa mai loa iai ma faafeiloai atu i le polokalame.
E lei leva ae ona maua le feau tusitusia a Salote i le messenger e faapea….”Uncle, its me Perkins”. Sa ia tali mai iai e faapea….”makua kele fo’i au pages”.
Na ta’ua e Vui sa faailoa atu e Perkins e faapea o ia e iai mea e fefe ai le mafuaaga.
Na ia faailoa foi le taimi na taunuu mai ai Perkins i Samoa ia Aokuso o le tausaga ua mavae ma faia loa ana faasalalauga e faapea o ia o se tagatanuu o Amerika ma faailoa ana aiātatau, ma e le mafai e se tuafono ona pai atu ia te ia.
Sa tali iai Vui i ia faasalalauga e faapea ia tatau la ona nofo ai pea i le Ofisa o le Malo Amerika i Samoa aua o le taimi lava e alu ese mai ai ma le Embassy ua afaina loa i Tulafono o eleele a Samoa.
Na faailoa e Vui o le taimi mulimuli na la fetaui ai ma talanoa ma Perkins ina ua afe atu le taavale ma tu i luma o lona fale, ma ia vaaia ai lē o loo molia o oso mai fafo o le taavale, sa ia fesili iai poo le a le mea ua oo atu ai….ma e le tatau foi ona toe talanoa atu ia te ia ona o ia le isi molimau o le mataupu lenei faasaga ia te ia.
Ae sa faapea atu le tamaitai ua molia….”O na lava e te molimau i si ou tei”
Sa tali iai Vui…. “E leai se leaga o ni finauga i mataupu o loo e talitonu lava oe iai, ae a oo mai loa i le Tulafono, e eseese la mea na”.
O loo faaauau taeao le molimau a Vui atoa ai ma le silasila mai i le zoom e faailoa foliga ma le tagata tonu e suafa ia Perkins Feagiai Headle, poo Tuifaasisina Perkin Tauvao, poo Salote Syrah Tautai ia poo Pekiga Tauvao e pei ona maua ai e le Faamasinoga suafa eseese nei ua ta’ua i le mau a Vui Masinamua o loo faaaoga e lē ua molia.
O tusitusiga ua mafua ai moliaga e 25 o le taufaalega o loo tuuina atu i upega tafailagi i lalo o igoa o Perkins ma Salote, ma o molimau e toafa ua mae’a tutulai ai i le Faamasinoga, e na o Vui ua mafai ona ia molimau i le sootaga lea o le igoa Salote ma le igoa Perkins ma le tagata o loo ia tauaveina ia igoa.
