O suesuega faasaga i se leoleo o le falepuipui i Tanumalala o loo faamalolo le tumau ai nei ua tulai mai ai le fesili tele pe faapefea ona maua laau faasāina o le mariuana i totonu o le lotoā.
Na faailoa mai e le Sui Komesina o Leoleo, Papalii Monalisa Tia’i – Keti i le feiloaiga ma tusitala, o suesuega faasaga i lea leoleo o le falepuipui ua maua ai ma faamatalaga a nisi o molimau faatuatuaina o loo feaveai mariuana i totonu o le falepuipui.
E le fou lenei vaega i le maua ai o laau faasāina i le falepuipui aua o se tasi foi o pagota na molia i le umia o laau faasāina a o tuli ai lana faasalaga i Tanumalala.
O le fesili tele poo fea e avatu ai nei fualaau faasāina ae faafefea foi ona oo atu i totonu o le lotoā i Tanumalala.
O loo faagasolo pea suesuega a leoleo ma e talitonu Papalii o loo iai nisi leoleo o le falepuipui o loo aafia ai i lenei faiga faasolitulafono.
