O le ausia ai o le 50 tausaga o sootaga faavaomalo a Samoa ma le atunuu o Farani, ua talafeagai ma se faaiuga a lea Malo e faatū sona ofisa i Apia ma faamautu ai i lo tatou atunuu sona sui o se Amepasa.

O le asiasiga a le Peresitene o Farani i nisi o Malo o le Pasefika i le vaiaso na tea nei na faailoa ai e le Peresitene o Emannuel Macron lea faaiuga ma ia ta’ua ai i sana saunoaga tusitusia le tāua o sootaga o lona Malo ma Samoa.

Ua faaopoopo mai le ofisa o lea Malo Europa i ofisa o isi Malo o loo ua faamautu i lo tatou atunuu, aemaise le faaiuga a le Malo tele o Amerika na faailoa i le amataga o le masina nei, o le iai lea o se ofisa o le Amepasa o le Iunaite Setete o Amerika i Apia ma faamautu ai foi ma lona Amepasa.

O Peretania le atunuu mulimuli lava ua iai lona ofisa o le Komesina maualuga i Samoa ma ua faamautu foi le Komesina o lea Malo i lo tatou atunuu.