Ua malie le Palemia fou o Niu Sila Chris Hipkins o le a silasila i se talosaga, o se petition sa tuuina ane e taitai o le komiuniti Pasefika i le toeitiiti tolu tausaga talu ai e faatatau i tagata ua ova aso i le atunuu.
O lea petition ua valaau ai mo ni nai avanoa agai atu i le nofomau ina ia faia mo tagata Pasefika ua ova aso i le atunuu i lalo o nisi o tuutuuga, compassion grounds.
O le petition lea na sainia e tagata e 11,119 ma sa talosagaina e le komiti na tuufaatasia lea faamoemoe ina ia silasila iai le Palemene.
O se mataupu sa fesiligia ai Hipkins e le RNZ Pacific pe iai se gaioiga ua faia i lea tulaga.
Fai mai le Palemia e manao e faamautinoa o loo iai se atunuu i Niu Sila e faaaloalogia ai tagata Pasefika, ma e iai o latou avanoa ma ia faaauau ai pea se sootaga malosi ma o latou foi atunuu moni.
Fai mai le mau a i latou o loo tuufaatasia lenei talosaga e le o finau ina ia solia le tulafono ae o loo finau mo nai tagata ua ova aso i Niu Sila e mafua mai i mafuaaga eseese aemaise i le taimi na poloka ai i le atunuu ona o le koviti ae le gata i lea o nisi o loo faigaluega pea i Niu Sila ma fesoasoani foi i le tamaoaiga o le atunuu ae le agavaa mo ni penefiti.
O le a tulituliloa lea mataupu pe o le a se faaiuga o le a faia mai e le Palemia ma ono maua ai se fesoasoani mo nai o tatou tagata.
