I le valu ai lenei o tausaga talu ona faagaioi le matagaluega e fitoitonu ma le vaaia o faalapotopotoga tuma’oti a le Malo, o le Aso Faraile na tea nei na fono ai sui o komiti faatonu e aofia ai ma nisi o Pule Sili ma le Minisita le tofa Leatinuu Wayne Sooialo, i le faamoemoe e faatalatalanoa faiga faavae e tatau ona mulimulitai ai komiti faatonu ma pulega o faalapotopotoga tuma’oti e 27, ina ia tausisia ai taiala o pulega lelei.
O se fonotaga foi na faasoa ai silafia ma tomai i le fia ausia o le autu tāua, o le galulue faatasi ia maua le sini o fuafuaga alualu mamao a le Malo, o le faaleleia o le tautuaina o le atunuu ma le tasi vaega tāua, o tupe maua mai polofiti e tuuina atu i le Malo mo ana galuega fai.
O le saunoaga a le Minisita le tofa Leatinuu Wayne Sooialo na ia faailo ai foi nisi o faafitauli ma luitau o loo feagai ma nisi o faalapotopotoga tuma’oti a le Malo.
Le tofa Leatinuu Wayne Sooialo o le Minisita o Faalapotopotoga tuma’oti.
O le 15 o faalapotopotoga tuma’oti a le Malo o loo aiaia faaletulafono e tatau ona tuuina atu o latou sao tau tupe poo dividend i le Malo i tausaga taitasi.
E fua le maualuga o ia sao tau tupe e lagolago ai galuega fai a le Malo, i le maua o tupe mamā poo polofiti.
