O le asō lea na faailoa faalauaitele ai i luga o fesootaiga televavave a le facebook, e le afioga i le alii Minisita o Tagata Pasefika, Hon Aupito Su’a William Sio, ua faia nei lana filifiliga o le a lē toe tausinio mo le nofoa o le itumalo Magele i le isi faigapalota lautele o sosoo mai a le atunuu i le tausaga fou 2023.

‘Ou te le o alu ese i se isi mea’ e pei ona saunoa Aupito, ma na ia ta’ua ina ua mae’a ona la talanoaina ma le Tamaitai Palemia, Hon Jacinda Ardern lana filifiliga, o lea o le a faaauau pea ona faatino ona tiute o le minisita o tagata Pasefika, minisita o Faamasinoga, ma isi uma tofiga o loo ia faatinoina i le taimi nei, ma o le a faaauau pea ona femalagaai i le faatinoga o na tiute i totonu o le atunuu ma atunuu mamao i le tausaga fou, seia oo i le taimi o le faigapalota lea o le a lē toe tauva ai loa.

I le tausaga fou i le aso 1 o Aperia, e atoa i ai le 15 tausaga talu ona ulufale Su’a i polokiki a Niu Sila, ma o se taimi umi lea sa ia auai ai i le Palemene, mai le itu agai seia oo ina ua tulai ai nei i le faigamalo le latou itu.

Ae na saunoa Su’a, ua oo mai le taimi ua tatau ona faaseetuagalu mai lea foi vaega o lona soifua tautua, i mea tau polokiki, ae ua tatau ona maua sona saolotoga e faaalu sona taimi mo lona aiga ma saga’i atu e tautua le tele o ona suafa matai na faaeaea mai ai ona aiga ia te ia.

Faaleo le faafetai o Su’a i lona itumalo faapalota, o uo ma aiga, aemaise le toatele o i latou sa mafai ona mafuta atu i ai ma amata masaniga ona o le tele o meafai a le komiuniti a tagata Pasefika sa ia auai ma latou faasoa faatasi ai i o latou mitamitaga o ni tagata Pasefika.

Atonu o se taimi e le o toe mamao ona toe faia lea o se faasilasilaga aloaia a le afioga i le alii minisita, ae sa na o sina taimi puupuu lea na ia faailoa ai lana faasilasilaga i le aouli o le asō, lea na ia ta’ua ai o ia le isi sui lea na faasino i ai le saunoaga a le Palemia, e iai nisi o sui o le Palemene o le a lē toe tausinio i le faigapalota lautele i le tausaga fou 2023.