I le mae’a pasia ai e le Komiti a le Kapeneta mo galuega o le atinae o le fuafuaga o le fausia o le faatanoa i Alaoa, o lea ua faailoa e le matagaluega o tupe a le Malo i lana upega tafailagi o fesootaiga, le faagasolo talu ai nei o se iloiloga o galuega mo le fausia o lea faatanoa vai tele.
Sa auai le faatonu o le ofisa o le Faletupe o Atinae a Asia mo atunuu o le Pasefika, ma nisi o ofisa sinia o le Faletupe o Atinae a Asia o le a faatupeina lea galuega tele.
Faaalia o le autu o lea talanoaga o le faasoa lea o manatu i taiala e faataoto ai galuega uma o le galuega i le va o sui o lea faletupe ma le Malo, ina ia faamautu ai tapenaga uma a o lei faatinoina le galuega.
Ua fuafua o lea faatanoa vai pe a mae’a fausia o le a mafai ona teu ai le suavai mo auaunaga e pei o le faaaogā e tagata, ma faaaogā i malosiaga faafouina e pei o le gaosia o le eletise mai le suavai.
Na feiloai atu sui o le Faletupe o Atinae a Asia i le Minisita o Tupe le afioga Lautimuia Afoa Uelese Vaai, faapea le Ofisa Sili o le matagaluega o tupe a le Malo, i aso amata a o lei faagasolo ia talanoaga i le atinae o le fausia o le faatanoa vai i Alaoa.
