O se tasi lenei o polokalame o aoaoga o loo faagasolo i le taimi nei e le Toomaga mo ē Puapuagatia i se poloketi o suesuega mo faamaumauga o puipuiga o sauaga na amatalia mai i le 2020.
E 30 sui mai afioaga e 10 o loo auai i lenei aoaoga ma o le lona 7 ai lea o kulupu ua aoaoina, o i latou ua mae’a mai lenei aoaoga o loo ua faagasolo ai nei le faamoemoe o lenei poloketi ma o loo galulue faatasi ai ma se tasi o faiaoga suesue mai le Iunivesite i Lonetona.
E pei ona ta’ua e le Peresitene o le Toomaga, Siliniu Lina Chang le faagasologa o lenei poloketi i sui o afioaga.
“E tusa ai o le faigapaaga a le Iunivesite lenei mai Lonetona faatasi ai ma le Iunivesite Aoao a Samoa ma le Ofisa o Faamaumauga a Samoa i lenei poloketi, o loo agai lemu lava le Toomaga e ausia se tasi o vaega tāua o le tuuina mai lea o le fesoasoani a soo se faalapotopotoga mo i latou na aafia i soo se ituaiga sauaga na aafia ai.”
O le auai o sui mai afioaga i lenei poloketi ua atagia ai le faalauaitele o le malamalama ma auala e utagia ai mafuaaga ma aafiaga o lenei faafitauli i totonu o le atunuu.
O le iloa ma le malamalama i nei vaega e tāua lea i lenei poloketi o loo naunau ia ausia, o le atina’e lea o auala ma metotia i totonu o afioaga e mafai ai ona faailoa lenei faafitauli agai i tina ma tamaitai i totonu o aiga.
E 3 aso o lenei aoaoga ma o loo agai e faatino auala o loo faaaogaina e nisi o atunuu lea o loo manuia ai le faagasologa o puipuiga ma le tetee atu i sauaga.
