I lalo o le polokalame ua ta’ua o le Just Play lea o loo taulamua ai le Faalapotopotoga Soka a Samoa faatasi ai ma le lagolagosua a le Matagaluega o Aoga Taaloga ma Aganuu e faatinoina lenei polokalame ua ta’ua o le Health and Wash e faatupulaia ai pea le faatāuaina o le soifua maloloina o fanau aoga.

O lenei polokalame o loo faaaogaina ai le taaloga o le soka e momoli ai lenei feau i tua i aoga.

Na saunoa lē o loo Faauluulu ai le Vaega o Polokalame a le faalapotopotoga, Pelenatete Taei lea o loo feagai ma le faatinoina o lenei vaega.

“O le naunautaiga lava ia o lenei polokalame ia avea le taaloga lenei o le soka ma taaloga e faamalosia le feau e fesoasoani e taiala fanau ia aoaoina ma iloa ona filifili lelei i meaai ma vaiinu e taumafa ai, o le tulaga i le tumamā ma le ola soifua maloloina lelei.

“O vaega uma ia e mafai ona momoli ai le feau e faaaoga ai le taaloga soka ma o le polokalame lenei a le Just Play o loo faatautaia lenei vaega tāua ia faatupulaia le soifua manuia o o tatou tagata e le gata i alo ma fanau ae o le mamalu lautele o le atunuu.”

O le masina fou lea e fuafua ai se aoaoga mo nisi o aoga mai i le atu Aleipata e tusa ai ma vaega  o le polokalame.