Ua savalia nei le lua masina talu ona malaga ese ma le atunuu le isi vaalele Twin Otter a le kamupani vaalele o le Samoa Airways mo Kanata auā galuega o le toe faaleleia atoa o le tino ma ona afi.
Ma ua faailoa ai e le kamupani vaalele le amata faagasolo o ia galuega.
O ata ua tuuina mai e le Samoa Airways faatasi ai ma se pepa o faamatalaga o loo faailoa ai ia galuega ma ua faailoa ai e le kamupani vaalele a le atunuu o le molimau lea o le faamuamua o le saogalemu i lana auaunaga ma le tautua mo tagata femalagaa’i.
O loo faatupe e le kamupani vaalele galuega faaleleia o le tasi lea o ona vaalele Twin Otter faatasi ai ma se nonogātupe mai le faalapotopotoga o mavaega tausi a Samoa le UTOS pe a mana’omia.
Ae o le vaalele muamua ua mae’a ona galuega faapea ma ua toe lele mo le feavea’iina o pasese ma uta, e sefulu miliona tālā le tau na faaleleia atoa ai.
O Mati o le tausaga fou 2026 o loo fuafua e tatau ona toe tulaueleele ai i Samoa le vaalele o loo iai nei i Kanata mo ia galuega.
