Ua savali nei i le sefulufitu tausaga o galulue faatasi le kolisi o matata eseese a Ausetalia o loo i Samoa, le Australia Pacific Training Coalition poo le APTC ma le Iunivesite Aoao o Samoa.
O nei tausaga e tele o le mafutaga ua toe faafou ai le la faiga paaga, i le naunautaiga autu ia faaauau ona galulue faatasi i le fetufaa’i o auala ma metotia e a’oa’o ai fanau auā o le lumanai manuia o aiga, nuu ma se atunuu.
E 48 le aufaigaluega a le iunivesite aoao a Samoa o le a maua ni a’oa’oga i le tomai faataitai ma pulega i lalo o fuafuaga o le faiga paaga ua toe faafou ma o le a fesoasoani atili lea i le siitia o a’oa’oga tau matata eseese mo fanau o loo a’oa’oina ia tomai.
O le tausaga e 2018 e 166 fanau na faauu mai le iunivesite aoao e aofia ai tamaitai e toa 13 sa maua tusipasi o le Vaega 2 poo le Certificate 2 i a’oa’oga tau i matata o le palama, fauina o meafale ma le faakamuta faapea le matata o le soo uamea poo le uelo.
O le sauniga na faatino aloaia ai le faafouina o le faiga paaga a le Iunivesite aoao a le atunuu ma le kolisi o matata eseese a Ausetalia na faailoa ai e le sui Komesina Maualuga o le Malo Ausetalia i Samoa le tāua o le lagolago atu o lana kolisi i manaoga o fanau i le a’oa’oina o matata auā o le galuega fai faatasi ma le iunivesite a Samoa.
E maualuga tele le tulaga amanaia o le faaaogāina o tusipasi e faaeaina ai fanau mai lea kolisi pe a malaga i atunuu i fafo aemaise i Ausetalia.
