O se tasi lenei o atina’e sa asia e le Afioga i le Kovana o Ausetalia David Hurley ma lana aumalaga e pei ona faatino i le asō.

O le Kolisi o Aana o loo faamanuiaina i se pokalame o loo fesoasoani ai le Malo o Ausetalia i le itu i aoaoga.

Ta’ua e Hurley o le lava o le tomai e faatino ai aoaoga a le fanau o se vaega tāua lea.

“O se tasi lenei o vaega o le aoaoina o fanau o le lava lea o le tomai ma le agavaa o faiaoga ma o le tulaga lea o le faasoa atu o lenei tomai e pei ona iai le polokalame lenei ua ta’ua o le BRIDGE sa tuufaatasia e Samoa ma Ausetalia ina ia atina’e ai le agavaa o faiaoga ia faatupulaia le maualuga mo le aoaoina o fanau.”

Na ia ta’ua ai le autu o lenei polokalame e le mo na o faiaoga ia maualuga lo latou tomai ae mo alo ma fanau ia aoaoina lelei.

Na faafetaia ai foi le lagolago a le Malo o Samoa i le galulue faatasi ai i le fuainumera o faiaoga ua tuuina ai le avanoa ma maua ai le mafutaga ma aoga i Ausetalia.

Na momoli foi le faafetai a le Pule o le Kolisi, Mefiposeta Pula mo le filifiliina o le Kolisi o Aana e tauala atu i ana faiaoga mo lenei avanoa tāua e auai ai i lenei polokalame.