O le louloua o le tau sa iai timuga i le taeao o le Aso Toonai ua mavae atu, ae lei taofia ai le faamaloulou atu o le mamalu o le atunuu e taputapuia le alo atu o tamafanau na malaga mai Samoa, o tamafanau mai Fiti, o Tonga faapea ma Niu Sila nei i le taamilosaga a le taitoafitu a Malisi lea sa faataunuuina i le malae i Manukau Rovers i Magele.
Sa mataina le faatumulia o malae uma e lua sa faatinoina ai taaloga e ‘au taitasi i mātua matutua seia oo lava i fanau, aemaise ai o nisi o faipule na malaga mai Samoa e taputapuai ‘au a latou nuu ma itumalo ae faapea foi o nisi o tama tuai o le taaloga lakapi lea sa auai atu ma faamalosia ‘au i alo ma fanau o loo faaauauina le taleni i le taimi nei.
I le faagasoloina o taaloga i Pool taitasi sa iloga ona maitauina le finau o ‘au taitasi mai a latou taaloga, auā sa finau uma ‘au i le manumalo aemaise lava i ‘au na malaga mai Samoa sa taumafai e faasikuea le malaga mamao mai i le taamilosaga lenei a le Malisi Pacific International Sevens Tournament 2023.
I le iuga sa iai taaloga a Pool taitasi, sa ofi mai ai loa ‘au tailua mai le Pool e saili ai le ipu autu.
O le Pool A na sao mai ai le ABBS Construction sa latou umia le siamupini o le taamilosaga lenei i le tausaga ua mavae faatasi ai ma le ‘au mai Samoa le Pacific Freight Siumu, Pool B na sao mai ai le Laumua o Tumua mai Afega se tasi o ‘au mai Samoa ma le Marist Samoa mai Samoa.
O le Pool C na agai mai ai le ‘au a le Ott Construction Tamauli mai Saleologa ma e tasi lava ‘au lea mai le motu o Savaii ma le Polyactive mai Hawkes Bay, faatasi ai ma le Pool D na sao mai ai le ‘au a le Laulii Lions i Aukilani ma le BBE Vaiala mai Samoa.
O le iuga sa iai le sailiga o ipu autu o taaloga, o le Final o le Bowl na taaalo ai le ‘au mai Fiti le Manurangi ma le ‘au mai Vaimoso, ma manumalo ai Vaimoso i le 24 ‘ai i le 21 a Manurangi, ma sa tauaao atu le Bowl ma le faailoga tupe $1000 mo Vaimoso ae $500 mo Manurangi.
O le sailiga o le Plate na taalo ai Marist St Samoa ma le Laumua o Tumua mai Afega ma manumalo ai le Laumua o Tumua i le 34 ‘ai i le 5 a Marist St Samoa, ma ua tuuina atu le Plate ma le faailoga tupe e $2000 mo Afega ae $1000 mo le Marist St Samoa.
O le ipu autu na taaalo ai le Laulii Lions Aukilani ma le Ott Construstions Tama Uli ma manumalo ai le Tama Uli i le 12 o latou ‘ai i le 5 a Laulii Lions ma ua tuuina atu nei le ipu o le siamupini o le taitoafitu a Malisi i Aukilani e lele lele atu i Samoa ma le Ott Constructions Tama Uli ma le latou faailoga tupe e $6000 ae tauaao atu le faailoga tupe mo Laulii Lions e $3000.
O le susuga ia Des Sepulona o le Ott Constructions Tama Uli na mauaina le ipu ma le $300 o le tama taalo o le taamilosaga.
O se fiafiaga sili ona tāua i le mamalu o le atunuu sa auai faapea le mafutaga a Malisi, ona sa iloga ona mataina le taumafaiga a ‘au mai Samoa i lenei tausaga, ae faapea foi i ‘au mai Niu Sila nei faatasi ai ma ‘au mai Fiti ma Tonga.
O lea ua agai uma atu ipu i Samoa i lenei tausaga ma le faamoemoe o le tausaga fou i le alofa o le Atua o le a toe foi mai ai ‘au nei ma ipu auā le faaauauina o le taamilosaga lenei a Malisi Aukilani.
Na taualuga le aso i le momoli ai o le agaga faafetai o le afioga i le peresetene o le asosi a Malisi i Aukilani le afioga ia Lemalu Semo Sititi i le paia o le mamalu o le auvalaaulia sa auai atu aemaise ai o ‘au taitasi sa malaga mamao mai auā le faataunuuina o le taamilosaga o le fitu a Malisi i lenei tausaga.
