Lata i le to’a 160 fanau aoga iunivesite o loo nonofo i le motu tele na faaogaina le avanoa na ofo atu e le Iunivesite Aoao o Samoa e faia ai se resitala i le motu tele i Salafai i le vaiaso nei.
Na faamaonia mai lea vaega e le Peresetene ma le Tapaau o le Iunivesite Aoao ia Aiono Alec Ekeroma i se faatalatalanoaga ma le Samoa Observer ma o se vaega taua lea mo fanau aoga o loo nonofo i lea vaega o le atunuu e faafaigofie ai ona resitala e aunoa ma se tau toe malaga i Upolu e resitala ai mo le Iunivesite.
O le taimi muamua lea ua fai ai se tulaga faapea talu ona faavae mai le Iunivesite i le tausaga e 1984 ma o se auala lelei ma faigofie mo fanau aoga, sefe ai le taimi ae faapea foi le tumutumu i Papaigalagala i tausaga taitasi mo faiga resitala.
E to’a 77 fanau aoga mai Savaii na resitala i le Aso Lulu ae to’a 82 na resitala i le Aso Tofi o le vaiaso nei lava o se fainumera tele foi lenei mai alo fanau o le motu tele ua resitala i le Iunvesite.
Taua e nisi o fanau aoga na auai e resitala le lagona fiafia ona o lenei suiga ua mafai ai ona resitala e aunoa ma se popole i tupe e faaalu ma le tele o feoaiga.
