O le alii o Fritz Lee, o lē sa kapeteniina le ‘au a le Manu Samoa i lana taaloga i le vaiaso talu ai ma Fiti, ua ave nei i ai le faaaloalo a lona afioaga o Solosolo, ina ua faaee atu ia te ia le suafa matai o le Nuafesili.
E ui lava i le tulaga na malolo ai le ‘au i le la taaloga ma le ‘au malosi a Fiti i le Aso Toonai talu ai, ae lei avea ma itu na maualalo ai le mitamita ma le agaga meemee o le afioaga i lo latou atalii ua iloa ai foi le afioaga ina ua tulai mai sana tamafanau e taitaia pe kapeteniina le ‘au tele a le atunuu, le Manu Samoa.
O le Aso Lulu, 2 Aokuso na faataunuu ai lea faamoemoe i le afioaga o Solosolo, ina ua faapaia ai le nofo a Fritz i le suafa matai tulafale, o Nuafesili.
Sa auai atu ai le pule mamalu a alii ma faipule o le afioaga o Solosolo, e lē gata i lea o uo ma aiga, aemaise foi o le ‘au a le Manu Samoa o i latou na maua le avanoa e auai atu e molimauina le faamoemoe tāua o le fetalaiga ia Nuafesili Fritz Lee.
A o lei see atu Nuafesili Fritz e taalo mo le Manu Samoa, sa taalo foi i le ‘au taitofitu a Niu Sila i le 2010, ma sa taalo foi Nuafesili i le ‘au a le Chiefs i le taamilosaga o le Super Rugby.
O isi ‘au na taalo ai foi Nuafesili a o iai i Niu Sila e pei o le ‘au a le Counties Manukau i le tausaga e 2013, ma sa manumalo ai le latou ‘au i lalo o lana taitaiga i le Ranfurly Shield ina ua faia’ina ai Hawkes Bay i Napier.
O le tausaga e 2013 na faamavae ai loa Nuafesili i le lakapi a Niu Sila ae malaga atu e taaalo lakapi i Falani.
O loo ta’ua i nisi o lipoti, o Nuafesili Fritz Lee ua 34 tausaga o lona soifua, ma sa soifua ane lava i Solosolo o le afioaga lea o lona tuaa tina, na aoga foi i Samoa seia oo ina ua 15 ona tausaga, na malaga atu ai loa i Niu Sila ma faamautu ai ma amata ai loa ona iloga mai lona tomai i le taaloga lakapi.
O ona tuaa o le tina ia Telefina mai le afioaga o Solosolo, ma lona tamā o Fritz mai le afioaga o Vailele.
