O le aumau i atunuu i fafo o o tatou aiga ma ua soifua ma fananau a’e ai isi tupulaga o isi foi suli ma feoi o suafa matai o aiga, e lē mafai lava ona faapea ua noatia ai i se finagalo o suli o se aiga o nonofo i Samoa, le faaee atu o ni suafa matai ia i latou, auā o lo latou aiātatau lea ma o le latou faasinomaga.
O le tamaitai o Matauaina Fotuotausala Audrey Malietoa Hill i Sini Ausetalia o loo faamautu ma ona mātua o isi ona uso, ma lona toalua ma le fanau, ae o ia o se tamaitai Samoa e ui sa ola ma soifua a’e i fafo, ae o loo naunau lona loto e fia tautua i lona aiga i Samoa e pei ona faaee iai le suafa tamalii o le Mauinatu o le aiga o lona tuaa tamā i le afioaga o Mulifanua.
O le afioga Mauinatu Matauaina Fotuotausala Audrey Malietoa Hill o se alo e faasino i le susuga Mauinatu Roy Etuati Malietoa ma le faletua ia Ulimasao o Sini Ausetalia.
E tasi lava le nofo sa faatino e le aiga ma sa faasopolia le faasoa i tupe ma ie o le Malo i le afioaga ma le itumalo aemaise malo usu.
O le tamaitai ua pale i le suafa Mauinatu o se tasi o loo galue i polokalame a le malo faasetete o Niu Sa Uelese, o loo fesoasoani ai i tupulaga o Samoa ma le Pasefika i totonu o le aai o Sini Ausetalia.
