Na faaauau i le taeao nei le tetee a avepasi a le kamupani a le NZ Bus lea e feoai i Aukilani.
Uma talanoaga ananafi a le Auckland Transport, NZ Bus ma le iuni e leai se maliega na ausia, ma o le mafuaaga lea ua faaauau mai ai i le taeao nei le tetee e le o feoai ai ni pasi a le NZ Bus mai le itula e 4 i le vaveao seia oo mai i le itula e 8 i le taeao nei.
O tetee ua faaauau ai a o leai se tali faamalieloto o le finau a le iuni mo totogi o avepasi, ma e le gata o le asō, ae o lea foi ua ta’u isi tetee i le taeao a taeao e faasolo atu ai i le Aso Tofi.
O le manaoga o avepasi Aukilani a le NZ Bus, ia tutusa o latou totogi i le itula ma avepasi o loo galulue i Ueligitone, Kalaiesetete ma Dunedin ma o avepasi foi nei a le NZ Bus ua silia ma le 10 tausaga e lei toe faia se siitaga o o latou totogi, seia vagana le sii ina ia faafetaiai ma le alu i luga o le tau o le soifuaga.
E leai ni talanoaga i le asō, na o taeao lea ua fuafua e toe fono ai.
O tetee nei a avepasi a le NZ Bus ua aafia ai le tusa ma le 700 o faigamalaga a pasi, ma e faitau afe tagata Aukilani ua aafia ai ma femalagaa’iga aemaise lava i le taimi pisi o le taeao.
