O le vaiaso nei i le Maota o Tuiatua Tupua Tamasese Efi i Sogi o loo faia ai le aoaoga mo le faalapotopotoga o le Nofotane i lalo o le Faamalu o le Toomaga mo ē Puapuagatia.

O le auga e pei ona ta’ua e le Peresetene ia Siliniu Lina Chang ia aoaoina tina ina ia lelei atoatoa a latou oloa ma ia umi ona aogā iai i le tapulaa maualuga lona gaosia.

E lē gata i lea ia silafia e tina itu e lelei ai le maketi auā a latou oloa.

Ia silafia le pulea lelei o seleni e maua ia mautinoa foi e faaauau pea le pisinisi aua ne’i iai se taimi e taofia ai ona o ni faaletonu.

E lē taufaailo le sa’o o lenei fola mo tina i o latou faiva o le tausia o aiga e pei ona fafatu ai e le Toomaga lenei polokalame ma faapena ona sasaa mai iai foai a nisi o malo i le taumafaiga. 

Na faaalia foi e Siliniu ua mae’a faaigoa oloa a tina i le faailoga o le Nofotane ina ia mautinoa e saili tonu lava iai i luga o fata o faleoloa e lē gata i Samoa nei ae o atunuu mamao. 

O lenei polokalame o se malamalama susulu atu mo nisi o tina ua ta’ua ina ua muta le faamoemoe ma avea ma auala e oo atu ai sauaga ona o le utiuti poo le leai foi o se tupe e faasoasoa.

O le taumafaiga lava ia o loo tulimataia le 20 o tina mai Salelologa i Savaii e auai ae 80 tina mai Apia ma vaevaeina i ona vaega e tolu.